सँकटमोचनमा टोले गुण्डा–गुण्डी बोलाएर शिक्षकमाथि कुटपिट, हिन्दु सम्राटको नाममा गुण्डागर्दी

न्यूज ब्यूरो, जनकपुरधाम । जनकपुरमा समुदायिक विद्यालयहरुमध्ये नाम चलेका सँकटमोचन माविमा भएको शिक्षकमाथि टोले गुण्डा–गुण्डी बोलाएर कुटपिट गरिएको देखिएको छ । 

जनकपुरधाम उपमहानगरपालिका वडा नं. ४ स्थित रहेको सो विद्यालयमा गत आईतबार विद्यालयबाटै रेस्ट्रीकेट हुने अवस्था सृजना गरेकी केही छात्राहरुले टोले गुण्डा र गुण्डी बोलाएर आफ्नै गुरु (शिक्षक)माथि कुटपिट गराएकी हुन् । उनीहरुले आफ्नो अभिभावकलाई नबोलाएर गैर–व्यक्तिहरु बोलाएर कुटपिट गराएको देखिएको छ । 

आईतबार भएको घटनापछि न्यूज ब्यूरोले निरन्तर अनुसन्धान, खोजबिन जारी राखेको अवस्थामा पीडित भनिएकी छात्राहरुले सोही टोलका केही टोले गुण्डा–गुण्डीहरु बोलाएर शिक्षक अखिलेश झामाथि कुटपिट गराइएको छ । 

आईतबार दिउँसो पत्रकारको भेषमा गएका टोले गुण्डा एवम् गुण्डीहरुले शिक्षकमाथि पूर्वाग्रह हुँदै कुटपिट गरेको पाईएको छ । जानकारी अनुसार, उनीहरु हिन्दु सम्राट सेना समूहका व्यक्तिहरु हुन् । हिन्दु सम्राट सेनाकी आफू सेनापति दाबी गर्दै आएकी लक्ष्मी साह नामक महिलाले शिक्षक अखिलेश झामाथि कुटपिट गरेको हो । उनीसँगै हिन्दु सम्राटकै अन्य महिला तथा युवकहरु भिडियोमा देखिएका छन् । 

उनीहरुले समुदायिक विद्यालयको कार्यालयभित्र पसेर शिक्षकमाथि कुटपिट गरेको हो । हिन्दु सम्राट सेनाको नाममा विभिन्न पक्षसँग बार्गेनिङग गरी यस्ता घटनाहरुलाई अन्जाम दिने गरेको बताइएको छ । 

यसरी भयो घटनाः
शिक्षकमाथि आरोप लगाउने केही छात्राहरुको रेकर्ड विद्यालयमा खराब छन् । उनीहरुको बाहिरी क्रियाकलाप र विद्यालय भित्रको क्रियाकलाप समेत विद्यालय प्रशासनलाई अपाच्य भएपछि दर्जनौ पटक चेतावनी दिइएको छ । विद्यालयका प्रधानाध्यापक बलराम साहको डायरीमा ती छात्राहरुको रेकर्डमा अन्तिम फैसला गरी विद्यालयबाट रस्ट्रिकेट गर्ने मात्र विकल्प लेखिएको छ ।

यसअघि कैयौँ पटक अभिभावकलाई बोलाएर ल्याउन प्रधानाध्यापकले उनीहरुसँग सूचना पठाएको थियो । विद्यालय प्रशासनबाट ती छात्राहरुको अभिभावकहरुलाई समेत फोन गरी विद्यालय आउन भनेको बताइएको छ । छात्राहरुको रेकर्ड सन्तोषजनक नभएको बुझेपछि अभिभावक समेत ती छात्राहरुको लागि पैरवी गर्न आएनन् । रष्ट्रिकेट हुने अवस्थाको बारेमा जानकारी पाएपछि ती छात्राले सोही टोलका केही टोले गुण्डा–गुण्डी (गैर–अभिभावक) लाई विद्यालयमा छिराएर आफ्नै शिक्षकमाथि कुटपिट गराइन् ।

छात्राले एक पटक आफूलाई रात राती शिक्षकले फोन गरेर हैरान पारेको बयान दिएकी छन् भने शिक्षक सामु गएपछि कक्षामै सबै विद्यार्थीको सामुन्ने अपशब्दहरु बोलेको आरोप लगाइन् । मिडियामा उनले बोलेकी कुरा र शिक्षकको सामुने बोलेकी कुरामा आकाश पातालको फरक भयो । शिक्षक अखिलेश झा र अरुण कर्णलाई लक्षित गरी योजनाबद्ध तवरले सो घटना हिन्दु सम्राट सेनाका कथित पदाधिकारीहरुले अन्जाम दिए ।

जनकपुरमा सँचालनमा रहेको दुई कोचिँङग सेन्टरबीचको बाहिरी लडाईमा सँकटमोचनकी ती छात्रालाई प्रयोग गरी हिन्दु सम्राट सेनाको नाममा बार्गेनिङग गरी घटना गराएको आरोप छ । आईतबार शिक्षकमाथि कुटपिट गर्नेहरुमध्ये एक जना पनि अभिभावक थिएनन् । सो घटनाको बारेमा अभिभावकलाई केही थाहा थिएनन् । छात्राले सोही टोलका केटाहरु बोलाएर कुटपिट गराएकी हुन् । 

हिन्दु सम्राट सेनाको नाममा बार्गेनिँग र गुण्डागर्दीः
राजेश यादव नेतृत्वको हिन्दु सम्राट सेनाले हिन्दुत्वको पक्षमा वकालत गर्दै आएको छ । उनीहरुको धर्मप्रतिको गतिविधिको चौतर्फी सराहना भईरहेको अवस्थामा हिन्दु सम्राट सेनामै राखिएको लक्ष्मी साहले पटक पटक विवादित कार्यमा सँलग्न हुँदै आएकी हुन् । हिन्दु सम्राट सेनाको लोकप्रियताको फाईदा उठाउँदै साहसहित अन्य युवकहरुले समेत बार्गेनिँग गर्ने, सुपारी लिने कार्यहरुमा सँलग्न हुँदै आएका छन् । सँकटमोचन स्कूलमा भएको घटनामा सरोकार नै नभएको हिन्दु सम्राट सेनाकी लक्ष्मी साहले निहुँ खोजेर शिक्षकमाथि कुटपिट गरेपछि चौतर्फी आलोचना समेत भएको छ । 

उनीहरु छात्राको न अभिभावक हुन त सरोकारबाला निकाय नै । छात्रासँग शिक्षकले दुरव्यवहार गरेको भए उनले प्रअ समक्ष वा आफ्नो अभिभावक समक्ष उजुरी गर्न सकिन्थ्यो । नजिकै रहेको प्रहरीमा समेत उजुरी गर्ने बाटो हुँदाहुँदै योजनाबद्ध तवरले कोचिँगको लडाईले दुई शिक्षकमाथि लक्षित गरी घटना गराईएको हो । जानकारी अनुसार, एक कोचिँग सेन्टरसँग हिन्दु सम्राटका ती सदस्यहरुले रकम उठाएर घटना गराएको हो । 

ती छात्राहरुलाई रष्ट्रिकेट गर्ने तयारीः
आफ्नै शिक्षकमाथि कुटपिट गर्न लगाउने छात्राहरुलाई विद्यालयबाट रष्ट्रिीकेट गर्ने तयारी गरिएको छ । न्यूज ब्यूरोसँगको कुराकानीमा प्रअ बलराम साहले चेतावनी अभर भएकोले उनीहरुलाई विद्यालयबाट सदाको लागि निष्कासन गर्ने तयारी गरिएको बताए । 

विद्यालयमा गुण्डा बोलाएर शिक्षकमाथि कुटपिट गराएको, विद्यालयको शान्ती सुरक्षामा खलल पुरयाएको, विद्यालय मान मर्यादामा खलल पुरयाएको, अभिभावकको साटो गैर अभिभावक र गुण्डाहरु बोलाएर मान मर्दन गरेको भन्दै उनीहरुलाई विद्यालयबाट रष्ट्रिकेट गर्ने तयारी गरिएको बताइएको छ ।