सरकारमा जान जनमतको बटमलाइन 'मधेशमा जनमतको मुख्यमन्त्री'

न्यूज ब्यूरो, जनकपुरधाम । केन्द्र सरकारमा मन्त्री मण्डल फेरबदल भईरहेको बेला डा. सिके राउत नेतृत्वको जनमत पार्टीले मधेशमा आँखा लगाएको छ । 

मधेश प्रदेशमा बलियो पार्टीको रुपमा उदय भएको जनमत पार्टीले केन्द्र सरकारमा जानको लागि मधेशमा मुख्यमन्त्रीको अडान अझै छाडेका छैनन् । मधेश प्रदेशमा जनमत पार्टीकै मुख्यमन्त्री हुनुपर्ने बटमलाईन अघि सारेको हो । 

मधेशमा सरकार निर्माणका लागि निर्णायक रहेको जनमतले मुख्यमन्त्री नपाएसम्म सत्ता गठबन्धनमा नजाने जनाएको छ ।

सरकारमा जान जनमतको बटमलाइन मधेश मुख्यमन्त्री  ‘मधेश मुख्यमन्त्री हाम्रो बटमलाइन हो । त्यो पक्का नभएसम्म सरकारमा जाँदैनौं,’ महासचिव चन्दन सिंहले भने ।

प्रतिनिधिसभामा ६ सिट रहेको जनमत र १२ सिट भएको जनता समाजवादीबीच मधेशमा चर्को संघर्ष हुँदै आएको छ । हाल जसपाका सरोजकुमार यादव मुख्यमन्त्री छन् । दुई दलबीच द्वन्द्व हुँदा केही समयअघि जनमत मधेश सरकारबाट बाहिरिएको थियो ।