पत्रकार विजय ठाकुर बजरंग बचत तथा ऋण सहकारीको अध्यक्षमा निर्विरोध निर्वाचित

न्यूज ब्यूरो, जनकपुरधाम । न्यूज ब्यूरोका पत्रकार विजय कुमार ठाकुर बजरंग बचत तथा ऋण सहकारी संस्था लिमिटेडको अध्यक्षमा निर्विरोध निर्वाचित भएका छन् ।

धनुषाको मिथिला बिहारी नगरपालिका–५, ललियामा रहेको सहकारी संस्थाको १६औँ वार्षिक साधारण सभाबाट ठाकुर अध्यक्ष पदमा निर्विरोध निर्वाचित भएका हुन् ।

पत्रकारितामा सक्रिय ठाकुरलाई सहकारीको नेतृत्वको जिम्मेवारीसमेत प्राप्त भएको हो । साधारण सभाले उनलाई संस्थाको अध्यक्षको जिम्मेवारी प्रदान गर्दै आगामी कार्यकालका लागि नेतृत्व चयन गरेको जनाइएको छ ।

अध्यक्षमा निर्विरोध निर्वाचित भएपछि ठाकुरले संस्थालाई थप व्यवस्थित, पारदर्शी र सदस्यकेन्द्रित बनाउनेतर्फ आफ्नो भूमिका प्रभावकारी बनाउने अपेक्षा गरिएको छ ।

स्थानीय स्तरमा पत्रकारितामार्फत सक्रिय रहँदै आएका ठाकुरको सहकारी क्षेत्रको नेतृत्वमा भएको प्रवेशलाई स्थानीय स्तरमा समेत चासोका साथ हेरिएको छ ।

ठाकुरको नेतृत्वमा सहकारीले सदस्यहरूको आर्थिक हित, संस्थागत सुशासन तथा सहकारीको उद्देश्यअनुसारका गतिविधिलाई थप प्रभावकारी बनाउने अपेक्षा गरिएको छ ।