जलेश्वरमा विद्युत सुरक्षा (करेन्ट) सम्बन्धी विद्यार्थीहरुलाई विद्युत प्राधिकरण जलेश्वरको सचेतना

न्यूज ब्यूरो, महोत्तरी ।  नेपाल विद्युत प्राधिकरण, जलेश्वर वितरण केन्द्रको आयोजनामा विद्युत सुरक्षा सम्बन्धी सचेतनामूलक कार्यक्रम सम्पन्न भएको छ ।

जलेश्वरस्थित श्री लचुमु माध्यमिक विद्यालयमा आयोजित कार्यक्रममा नेपाल विद्युत प्राधिकरण जलेश्वर वितरण केन्द्रकी इन्जिनियर विनिता मण्डलसहितको प्राविधिक टोलीले कक्षा ९ मा अध्ययनरत विद्यार्थीहरूलाई विद्युत सुरक्षासम्बन्धी जानकारी तथा प्रशिक्षण प्रदान गरेको हो ।

कार्यक्रममा विद्युतको सुरक्षित प्रयोग, विद्युत लाइन तथा विद्युतीय उपकरणबाट हुन सक्ने जोखिम, करेन्ट लाग्नबाट बच्ने उपाय तथा आपत्कालीन अवस्थामा अपनाउनुपर्ने सावधानीका विषयमा विद्यार्थीहरूलाई जानकारी गराइएको थियो ।

विद्युत उपकरण प्रयोग गर्दा अपनाउनुपर्ने सावधानी, विद्युत तार तथा लाइनबाट सुरक्षित दूरी कायम गर्ने उपाय र जोखिमपूर्ण अवस्थामा तत्काल अपनाउनुपर्ने सुरक्षा प्रक्रियाबारे समेत विद्यार्थीहरूलाई जानकारी दिइएको जनाइएको छ ।

विद्यार्थीहरूमा विद्युत सुरक्षासम्बन्धी ज्ञान अभिवृद्धि गर्दै सम्भावित विद्युतजन्य दुर्घटना न्यूनीकरण गर्ने उद्देश्यले कार्यक्रम आयोजना गरिएको नेपाल विद्युत प्राधिकरण जलेश्वर वितरण केन्द्रले जनाएको छ ।