धनुषाको अनौठो घटनाः बिवाहको मिति तय भएको बेला बेहुला पक्ष बिहेको मिति नै बिर्सिएपछि

न्यूज ब्यूरो, जनकपुरधाम । धनुषामा तय भएको विवाहको दिन बेहुली पक्षले सबै तयारी पूरा गरिसके पनि जन्ती नआएपछि अनौठो अवस्था सिर्जना भएको घटना बाहिरिएको छ । 

धनुषाको सबैला नगरपालिका वडा नं. ५ मखनाहामा तय भएको विवाहमा बेहुली पक्षले विवाहका लागि सम्पूर्ण तयारी पूरा गरेको थियो । तर, तय गरिएको मिति ५ असोजमा दिउँसोसम्म पनि जन्ती नआएपछि बेहुली पक्षका केही व्यक्ति बेहुलाको घर पुगे ।

बेहुलाको घर पुगेपछि उनीहरूले जन्ती किन नआएको भनेर कारण सोध्दा बेहुला पक्षबाट आएको जवाफले सबैलाई अचम्मित बनायो ।

‘हाम्रो बिहे त १० गते हो’ भन्दै बेहुला पक्षले जवाफ दिएपछि बेहुली पक्ष झस्किएको थियो ।

मखनाहाबाट गणेशमान चारनाथ नगरपालिका–६ गोदारमा जन्ती जाने गरी विवाहको मिति तय गरिएको थियो । दुवै पक्षबीच विवाहको मिति तय भए पनि मिति सम्झने विषयमा भएको आपसी बुझाइको समस्याका कारण विवाहको दिन नै अन्योल सिर्जना भएको स्थानीयले बताएका छन् ।

घटनाबारे स्थानीयसँग बुझ्दा बेहुला पक्ष आर्थिक रूपमा विपन्न परिवार रहेको र विवाहको मिति तथा तयारीका विषयमा आपसी समन्वयमा अलमल भएको बताइएको छ ।

विवाहजस्तो दुई परिवार र आफन्तबीचको महत्वपूर्ण सम्बन्धमा मिति नै फरक बुझिएपछि घटना स्थानीयस्तरमा चर्चाको विषय बनेको छ । सामाजिक सञ्जालमा समेत घटनाबारे लेखिएको स्टेटस भाइरल भएपछि यसको चर्चा थप चुलिएको हो ।

स्थानीयका अनुसार घटनाबारे दुवै पक्षबीच छलफल भएपछि विवादको अवस्था नरहेको र वास्तविकता बुझेर विवाहको कार्यक्रम अघि बढाउने सहमति भएको छ ।

समझदारीपछि सोही दिन (असोज ५) साँझ जन्ती गोदार पुगेपछि विधिवत विहे भएको जनाइएको छ । 

प्रविधिको युगमा मोबाइलमा मिति सम्झाउन रिमाइन्डर राख्न सकिने भए पनि विवाहजस्तो महत्वपूर्ण कार्यक्रमको मिति नै फरक बुझिएपछि धनुषाको यो घटना अहिले स्थानीयदेखि सामाजिक सञ्जालसम्म ‘बिहेको मिति ५ कि १० ?’ भन्ने रोचक चर्चाको विषय बनेको थियो ।