गोलबजार मेयर गोल्डकपमा पासङ लामाको निर्णायक गोलले सलहेश युवा क्लबको शानदार जीत

न्यूज ब्यूरो, काठमाडौं। देशभरका सरकारी अस्पतालहरूमा अब साताको दुई दिन—शनिबार र आइतबार—नियमित ओपिडी सेवा बन्द हुने भएको छ। स्वास्थ्य क्षेत्रमा क्रियाशील १४ वटा संयुक्त पेसागत संगठनको चर्को दबाबपछि सरकारले यस्तो निर्णय लिएको हो।

स्वास्थ्य तथा जनसंख्या मन्त्रालय ले जनाएको अनुसार, ओपिडी सेवा बन्द भए पनि आकस्मिक ९इमर्जेन्सी० तथा अन्तरंग ९इनडोर० सेवा भने २४ सै घण्टा सञ्चालनमै रहनेछ।

स्वास्थ्य मन्त्री निशा मेहता, स्वास्थ्य सचिव डा. विकास देवकोटा र विभिन्न पेसागत संगठनका प्रतिनिधिबीच मन्त्रालयमा भएको छलफलपछि सरकार लचक देखिएको हो।

मन्त्रालय स्रोतका अनुसार, “शनिबार र आइतबार दुवै दिन बिदा दिने सहमति भइसकेको छ, औपचारिक घोषणा छिट्टै हुँदैछ।”

नेपाल चिकित्सक संघ का अध्यक्ष डा. अनिलविक्रम कार्की को संयोजकत्वमा रहेको दबाब समूहले स्वास्थ्यकर्मीलाई पनि अन्य सरकारी कर्मचारीसरह दुई दिन बिदा दिनुपर्ने माग गर्दै आएको थियो।

उनीहरूले बढ्दो कार्यबोझ, मानसिक तनाव र सेवामा निरन्तरताका कारण स्वास्थ्यकर्मीहरू थकित भएको दाबी गर्दै आन्दोलनको चेतावनी दिएका थिए।

यसअघि मन्त्रिपरिषद्ले २०८२ चैत २२ गते सबै सरकारी कर्मचारीलाई दुई दिन बिदा दिने निर्णय गरेको थियो। तर स्वास्थ्य मन्त्रालयले अस्पतालहरूमा आइतबार पनि ओपिडी सेवा सञ्चालन गर्न निर्देशन दिएको थियो।

यही निर्णयप्रति असन्तुष्टि जनाउँदै स्वास्थ्यकर्मीहरू आन्दोलनको तयारीमा उत्रिएका थिए।

अब देशभरका सरकारी अस्पतालमा शनिबार र आइतबार ओपिडी सेवा बन्द रहने छ । आकस्मिक सेवा भने २४सै घण्टा खुल्ला रहनेछ भने इनडोर सेवा निरन्तर सँचालनमा रहनेछ । 

तर, दुई दिन ओपिडी बन्द हुँदा बिरामीको चाप आकस्मिक सेवामा बढ्ने अनुमान गरिएको छ। यसलाई मध्यनजर गर्दै सरकारले इमर्जेन्सी सेवाको क्षमता विस्तार गर्ने तयारी थालेको मन्त्रालय स्रोतले जनाएको छ।

सरकारको निर्णयसँगै सर्वसाधारणमा भने चिन्ता बढेको छ। विशेषगरी ग्रामीण क्षेत्रका बिरामीहरू दुई दिनसम्म नियमित उपचारबाट वञ्चित हुनसक्ने देखिन्छ।

सरकारले स्वास्थ्यकर्मीको हक र सेवाग्राहीको पहुँचबीच सन्तुलन मिलाउन अब कस्तो रणनीति अपनाउँछ, त्यो हेर्न बाँकी छ।