आज नयाँ सरकार बनाउन दाबी पेस गर्दै दलहरू, सात दल आन्तरिक कचौलीमा

न्यूज ब्यूरो, जनकपुरधाम ।  सबैला नगरपालिकाले प्रविधिमैत्री कृषि प्रवर्धन गर्दै तीनवटा आधुनिक कृषि यन्त्र खरिद, किसानलाई छिटै सुलभ दरमा उपलब्ध गराइने
धनुषाको सबैला नगरपालिकाले कृषिमा प्रविधिको प्रयोग बढाउँदै तीनवटा अत्याधुनिक कृषि यन्त्रहरू खरिद गरेको छ। 

स्थानीय किसानलाई कृषिमा आधुनिक प्रविधि अपनाउन प्रेरित गर्न र उत्पादनशीलता वृद्धि गर्न उद्देश्यले रिपर मेसिन, जिरो टिलर तथा मलचर मेसिन खरिद गरिएको हो।

नगरपालिकाले किसानहरूको श्रम, समय र लागतलाई न्यून पार्ने रणनीति अन्तर्गत यी उपकरणहरू उपलब्ध गराउने तयारी गरेको छ। रिपर मेसिनले धान तथा गहुँ जस्ता अन्नबाली सजिलै र छिटो काट्न सकिने सुविधा प्रदान गर्दछ। यसले परम्परागत तरिकाले गरिँदै आएको समय खर्चिलो र श्रम प्रधान कटाई प्रक्रियालाई सहज बनाउनेछ।

त्यस्तै, जिरो टिलर मेसिन प्रयोग गरी किसानहरूले सिधै खेतमा धानको बीउ छर्न सक्नेछन्, जसले गर्दा अब खेतमा धान रोपाइँ गर्नु पर्ने आवश्यकता हट्नेछ। यस प्रविधिबाट किसानलाई खेत जोत्न, पानी भरिराख्ने, रोपाइँको लागि जनशक्ति व्यवस्थापनजस्ता जटिल प्रक्रिया हटाइने हुँदा उत्पादन लागतमा ठुलो कटौती हुनेछ।

मलचर मेसिन भने धानको फसल काटिसकेपछि बाँकी रहेको बोटविरुवा तथा जरालाई पूर्णरूपमा जोत्नु नपरी त्यसमै गहुँको बीउ, मल र खाद छरेर खेती गर्न सकिने प्रविधि हो। यसले झारपात नियन्त्रण गर्नुका साथै बाँकी जरा र जैविक अंशलाई प्राङ्गारिक मलमा परिणत गर्न मद्दत गर्छ। यो यन्त्र प्रयोग गर्दा खेतको दोहोरो जोताइ गर्नु नपर्ने हुँदा समय र खर्च दुवै बचत हुने र गहुँ उत्पादनमा उल्लेखनीय वृद्धि हुने कृषि शाखा प्रमुखले बताए । 

सबैला नगरपालिकाका नगर प्रमुख कारी राम यादवका अनुसार छिट्टै कार्यपालिकाको बैठकमार्फत यिनै कृषि यन्त्रहरूको भाडादर तोक्ने तयारी भइरहेको छ। उहाँले भन्नुभयो किसानहरुले यश मेसिनहरुवाट  अधिकतम सुविधा लिनको लागि  सक्दो न्यूनतम भाडादरमा मेसिनहरु  उपलब्ध गराइनेछ। किसानको उत्पादन लागत घटाउँदै प्रविधिमा आधारित कृषि प्रणालीमा परिवर्तन ल्याउन यो प्रयास गरिएको हो।

नगर प्रमुख यादवले थप भन्नुभयो सबैला नगरपालिका कृषि उत्पादनमा अगाडि बढाउन, किसानको जीवनशैलीमा सुधार ल्याउने  उद्देश्यका साथ यस्ता उपकरणको प्रयोगलाई संस्थागत बनाउँदैछौं। किसानहरूले अब बिउ छर्नेदेखि फसल संकलनसम्म प्रविधिको भरमा छिटो, सस्तो र सरल तरिकाले कृषि गर्न सक्नेछन्।

यस कार्यक्रमले कृषिमा आधुनिकीकरण गर्ने, कृषकलाई प्राविधिक ज्ञानसहित सशक्त बनाउने र कृषि पेशालाई आत्मनिर्भर र लाभदायक बनाउन टेवा पुग्ने विश्वास गरिएको छ। स्थानीय कृषकहरूले समेत नगरपालिकाको यो पहललाई स्वागत गर्दै यस्तो प्रविधियुक्त सहयोगले आफूहरूलाई कृषि व्यवसायमा थप उत्साहित बनाएको प्रतिक्रिया दिएका छन्।