रास्वपा सहमन्त्रीमा जुली यादवको उम्मेदवारी

काठमाडौं । नेपाली कांग्रेसका निवर्तमान सभापति शेरबहादुर देउवाले जनता नै देशको मालिक भएको बताउँदै जनताले चाहेको कुरा नै अन्ततः हुने बताएका छन् ।

बिहीबार स्वदेश फर्किएपछि चुनदेवीस्थित कांग्रेस संस्थापन इतरको सम्पर्क कार्यालयमा नेता तथा कार्यकर्तालाई संक्षिप्त सम्बोधन गर्दै देउवाले संविधान, गणतन्त्रलगायतका विषय जनताको चाहना र संविधानसभाबाट स्थापित भएको उल्लेख गरे ।

‘संविधानसभाले ल्याएको हो, गणतन्त्र । मैले ल्याएको हो र?’ देउवाले भने, ‘मैले चाहँदा आएको पनि होइन, मैले चाहेर जाँदैन पनि ।’

नेपाली जनता नै देशको सबैभन्दा ठूलो शक्ति र मालिक भएको बताउँदै उनले जनताले जे निर्णय गर्छन्, त्यही स्वीकार गर्नुपर्ने धारणा राखे ।

‘नेपाली जनता सबैभन्दा ठूलो कुरा हो । नेपाली जनता नेपालको मालिक हो । यो मालिकले जे भन्यो त्यही हुन्छ,’ देउवाले भने ।

देउवाले नेपाली जनता र न्यायपालिकाप्रति आफूलाई पूर्ण विश्वास रहेको पनि बताए । सर्वोच्च अदालतले पञ्चायतकालदेखि नै निष्पक्ष न्याय दिँदै आएको उल्लेख गर्दै उनले अदालतप्रति आफ्नो विश्वास कायमै रहेको बताए ।

‘सर्वोच्च अदालत पञ्चायतकालदेखि नै निष्पक्ष न्याय दिएको अदालत हो । यो अदालतप्रति मलाई पूरा विश्वास छ,’ उनले भने ।

आफू आगामी दिनमा पनि राजनीतिक संघर्षमा निरन्तर लागिरहने देउवाले बताए ।