Fact Check: टनलभित्रको रेस्क्यू भिडियो गृहमन्त्री सुदन गुरुँगको होईन, भारत उत्तराखण्डको हो

न्यूज ब्यूरो, जनकपुरधाम । जनकपुरधामस्थित जनकपुर हेल्थ केयर एन्ड डायग्नोस्टिक सेन्टरमा कार्यरत चिकित्सक डा. शशी शेखर अधिकारीमाथि कार्यस्थलमै कुटपिट भएको घटनाप्रति नेपाल चिकित्सक संघले गम्भीर आपत्ति जनाएको छ ।

नेपाल चिकित्सक संघले जारी गरेको प्रेस विज्ञप्तिअनुसार भदौ ६ गते काम गरिरहेको अवस्थामा एक समूहका व्यक्तिहरू स्वास्थ्य संस्थामा प्रवेश गरी डा. अधिकारीमाथि हातपात गरेका थिए । कुटपिटबाट चिकित्सकका भाइसमेत घाइते हुने गरी घटना भएको संघले जनाएको छ ।

स्वास्थ्य संस्थामै चिकित्सकमाथि भएको आक्रमणलाई संघले स्वास्थ्यकर्मीमाथिको गम्भीर असुरक्षा र दण्डहीनताको उदाहरणका रूपमा लिएको छ ।

संघले स्वास्थ्य सेवामा खटिएका चिकित्सक तथा स्वास्थ्यकर्मीमाथि हुने यस्ता आक्रमण र निन्दनीय गतिविधिको कडा शब्दमा भर्त्सना गर्दै घटनामा संलग्न दोषीलाई तत्काल कानुनी दायरामा ल्याउन माग गरेको छ ।

नेपाल चिकित्सक संघका अध्यक्ष डा. बद्री रिजाल र महासचिव डा. विश्वराज दवाडीले जारी गरेको विज्ञप्तिमा स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (पहिलो संशोधन, २०७९) बमोजिम दोषीमाथि कडा कारबाही गर्न सम्बन्धित निकायसँग जोडदार माग गरिएको छ ।

चिकित्सकमाथि कार्यस्थलमै आक्रमण भएपछि जनकपुरमा स्वास्थ्यकर्मीको सुरक्षामाथि समेत प्रश्न उठेको छ । उपचारका क्रममा चिकित्सक तथा स्वास्थ्यकर्मीमाथि हुने हातपात, धम्की र दुर्व्यवहारका घटना बढ्दै गएको भन्दै संघले यस्ता गतिविधिप्रति शून्य सहनशीलताको नीति अपनाउन सरकारसँग माग गरेको छ ।

स्वास्थ्य संस्था उपचार र सेवाका लागि सुरक्षित क्षेत्र हुनुपर्नेमा चिकित्सकमाथि नै आक्रमण हुनु गम्भीर विषय भएको संघको भनाइ छ । दोषीमाथि तत्काल कानुनी कारबाही नभए यस्ता घटनाले चिकित्सक तथा स्वास्थ्यकर्मीलाई असुरक्षित वातावरणमा काम गर्न बाध्य बनाउने चेतावनीसमेत संघले दिएको छ ।

नेपाल चिकित्सक संघले घटनामा संलग्न व्यक्तिहरूमाथि कानुनअनुसार कडा कारबाही गरी चिकित्सक तथा स्वास्थ्य संस्थाको सुरक्षा सुनिश्चित गर्न सम्बन्धित निकायको ध्यानाकर्षण गराएको छ ।

घटना किन भएको बारेमा पीडित भनिएका डा. अधिकारीसँग सम्पर्क गर्दा उनले बुवा आईसीयूमा भएकोले कुरा गर्न नमिल्ने बताए । 

यस सन्दर्भमा जिल्ला प्रहरी कार्यालय धनुषाले भने घटना भएको पुष्टि गरे । उनले सिसिटिभी समेत आक्रमणकारीहरुले लगेको बताउँदै मोबाईलमा भएको केही प्रमाणहरुको आधारमा छानबिन सुरु गरिएको बताएको छ । 

जिल्ला प्रहरी धनुषाका प्रवक्ता डिएसपी  ओम प्रकाश खनालका अनुसार, घटना भएको देखिएको बताए । उनले सोही अनुसार छानबिन प्रक्रिया अगाडी बढाउँदै घटनामा संलग्नहरुको खोजी तीव्र पारिएको बताए ।