भोटेकोशी बाढीमा मधेशका ८ जिल्लाका १२६ जना बेपत्ता, सप्तरीकै ३० जना

न्यूज ब्यूरो, जनकपुरधाम । रसुवाको भोटेकोशी नदीमा आएको विनाशकारी बाढीमा परी मधेश प्रदेशका आठ जिल्लाका १२६ जना बेपत्ता भएका छन् ।

मधेश प्रदेश प्रहरी कार्यालयले उपलब्ध गराएको जिल्लागत विवरणअनुसार शुक्रबार दिउँसोसम्म मधेशका आठै जिल्लाबाट १२६ जनाको नाम बेपत्ता सूचीमा संकलन गरिएको हो ।

प्रदेश प्रहरीका अनुसार सबैभन्दा बढी सप्तरीका ३० जना बेपत्ता छन् । त्यसपछि पर्साका २८, बाराका १९, रौतहटका १५, सर्लाहीका १०, महोत्तरीका १०, सिरहाका ९ र धनुषाका ५ जना बेपत्ता सूचीमा छन् ।

बेपत्ता हुनेहरूमा रोजगारी तथा कामको सिलसिलामा रसुवा पुगेका मधेशका नागरिकको संख्या ठूलो रहेको प्रहरीले जनाएको छ । उनीहरूमध्ये अधिकांश अपर त्रिशूली जलविद्युत आयोजना तथा अन्य जलविद्युत आयोजनामा कार्यरत इन्जिनियर, कामदार र उनीहरूका परिवारका सदस्य रहेको प्रदेश प्रहरी कार्यालयले जनाएको छ ।

प्रहरीको विवरणअनुसार सप्तरीका बेपत्ता व्यक्तिहरू महादेवा, कञ्चनरूप, डाक्नेश्वरी, तिलाठी कोइलाडी, बोदेबरसाइन, राजगढलगायत स्थानीय तहका छन् ।

पर्साका बेपत्ता नागरिकहरू वीरगञ्ज महानगरपालिका, पोखरिया, बहुदरमाई, पटेर्वासुगौलीलगायत विभिन्न स्थानीय तहका रहेका छन् । बाराका बेपत्ता व्यक्तिहरू कलैया उपमहानगरपालिका, परवानीपुर, निजगढ, जितपुर सिमरा, सुवर्णलगायत क्षेत्रका छन् ।

त्यस्तै रौतहटका बेपत्ता नागरिकहरू चन्द्रपुर, गौर, राजदेवी, ईशनाथलगायत स्थानीय तहका रहेका छन् । सर्लाहीबाट लालबन्दी, ईश्वरपुर तथा हरिपुर क्षेत्रका नागरिक बेपत्ता सूचीमा छन् ।

महोत्तरीका बेपत्ता नागरिकहरू गौशाला र जलेश्वरलगायत क्षेत्रका रहेका छन् । धनुषाका बेपत्ता व्यक्तिहरूमध्ये हंसपुर र कमला नगरपालिका क्षेत्रका नागरिक छन् । सिरहाबाट मिर्चैया, गोलबजार र धनगढीमाईलगायत क्षेत्रका नागरिक बेपत्ता रहेको विवरणमा उल्लेख छ ।

बेपत्ता हुनेहरूको उमेरमा पनि ठूलो विविधता देखिएको छ । सूचीमा तीन वर्षका बालकदेखि ७० वर्षीया महिलासम्म रहेका छन् । सप्तरीको खडक नगरपालिका–७ का तीन वर्षीय दिवस रामसमेत बेपत्ता सूचीमा छन् ।

त्यस्तै धनुषाको हंसपुर नगरपालिका क्षेत्रकी ७० वर्षीया ज्ञाती देवी यादव पनि बेपत्ता रहेको प्रहरीले जनाएको छ ।

मधेश प्रदेश प्रहरी कार्यालयका प्रमुख डीआईजी ओमप्रसाद अधिकारीका अनुसार फोन तथा विभिन्न सञ्चार माध्यमबाट शुक्रबार दिउँसोसम्म प्रदेशका आठै जिल्लाबाट १२६ जना बेपत्ता भएको विवरण संकलन गरिएको हो ।

नामावली संकलनको काम अझै जारी रहेकाले बेपत्ता हुनेको संख्या थप बढ्न सक्ने अधिकारीले बताएका छन् ।

भोटेकोशी नदीमा आएको बाढीको प्रभाव रसुवाबाट तलतिर नुवाकोट, धादिङ, चितवनलगायत जिल्लासम्म परेको छ । बाढी तथा पहिरोबाट ठूलो मानवीय क्षति भएको छ भने नेपाल प्रहरीले शुक्रबार दिउँसोसम्म ४८९ जनाको मृत्यु भएको जनाएको छ ।

बाढी प्रभावित क्षेत्रमा नेपाली सेना, नेपाल प्रहरी र सशस्त्र प्रहरीसहितका सुरक्षा निकायले खोज तथा उद्धार कार्य जारी राखेका छन् ।