अब हप्तमा दुई दिन बिदा दिने निर्णय, स्कूलमा बैशाख १५ देखि लागू हुने

न्यूज ब्यूरो, जनकपुरधाम । धनुषाको क्षीरेश्वरनाथ नगरपालिका–५ महेन्द्रनगरका एक व्यवसायीले आफ्नो गोदाममा सञ्चालकको अनुपस्थितिमा छापा मारेर सम्पूर्ण सामान उठाएर लगेको भन्दै सशस्त्र प्रहरी र जनकपुर भन्सार कार्यालयप्रति आपत्ति जनाएका छन् ।

महेन्द्रनगरका व्यवसायी शिवशंकर साहले सञ्चालन गर्दै आएको शिवपार्वती ट्रेडर्सको गोदाममा आइतबार दिउँसो सशस्त्र प्रहरीको अगुवाइमा खानतलासी गरिएको थियो । गोदाममा ताला लागेको र सञ्चालक तथा अन्य व्यक्ति उपस्थित नरहेको अवस्थामा छापा मारिएको व्यवसायी साहको दाबी छ ।

जनकपुर भन्सार कार्यालयले गोदाममा भन्सार छली तथा चोरी पैठारीका सामान रहेको आशंकामा सूचना टाँस गरेको थियो । त्यसपछि गोदामबाट विभिन्न सामग्री नियन्त्रणमा लिएर लगिएको बताइएको छ ।

तर व्यवसायी साहले भने आफ्नो गोदाममा भन्सार छली वा चोरी पैठारीका सामान नरहेको दाबी गरेका छन् । उनले अधिकांश सामग्री नेपालमै उत्पादित रहेको र विदेशबाट ल्याइएका केही सामग्रीको समेत बिल–बिजक तथा भन्सारसम्बन्धी कागजात आफूसँग सुरक्षित रहेको बताए ।

‘सबै सामानको बिल–बिजक र भन्सार काटेको कागजात हुँदाहुँदै गोदाममा कोही नभएको मौका छोपेर ताला फुटाएर सामान उठाएर लगियो,’ साहले भने, ‘यो व्यवसायीलाई तर्साउने र मानसिक दबाब दिने काम हो ।’

गोदाममा ताल्चा लागेको अवस्थामा सञ्चालकको अनुपस्थितिमा गरिएको खानतलासी र सामान नियन्त्रणमा लिने प्रक्रियाप्रति उनले आपत्ति जनाउँदै घटनाले व्यवसायीमा त्रास सिर्जना गरेको बताए ।

क्षीरेश्वरनाथ उद्योग वाणिज्य संघ महेन्द्रनगरका अध्यक्ष सुरेश यादवले सरोकारवाला तथा व्यवसायीलाई जानकारी नदिई सञ्चालकको अनुपस्थितिमा गरिएको छापामारीप्रति आपत्ति जनाएका छन् । उनले कानुनी प्रक्रिया पूरा गरेर मात्र व्यवसायिक प्रतिष्ठानमा खानतलासी तथा सामान नियन्त्रणमा लिनुपर्ने बताए ।

क्षीरेश्वरनाथ नगरपालिका–५ का वडाध्यक्ष जिवछ मण्डलले आफूले व्यवसायी वा जिम्मेवार व्यक्ति उपस्थित नभएसम्म छापा नमार्न आग्रह गरे पनि सशस्त्र प्रहरीले बेवास्ता गरेको बताए ।

आफ्नो रोहबरमा छापा मारिएको भन्दै भन्सार कार्यालयले सूचना टाँस गरेको भए पनि नियन्त्रणमा लिइएका सामानको विवरण आफूलाई नदेखाइएको मण्डलको भनाइ छ । सामानको विवरण नदेखाइएपछि आफूले पछि कुनै कागजातमा सहीछाप नगरेको उनले बताए ।

यता जनकपुर भन्सार कार्यालयले भने उक्त गोदाममा आफूहरूको नेतृत्वमा नभई सशस्त्र प्रहरीको अगुवाइमा छापा मारिएको जनाएको छ ।

जनकपुर भन्सार कार्यालयका प्रमुख रमेश नेपालीले सशस्त्र प्रहरीको अगुवाइमा कारबाही भएकाले आफूहरूलाई घटनाबारे विस्तृत जानकारी नभएको बताए ।

उनका अनुसार गोदामबाट केही पटाका समेत फेला परेको जानकारी आफूलाई प्राप्त भएको छ ।

व्यवसायीले सबै सामान वैध कागजातसहित रहेको दाबी गरिरहेका बेला नियन्त्रणमा लिइएका सामग्रीको वास्तविक अवस्था, बरामद सामानको विवरण तथा खानतलासीको कानुनी प्रक्रियाबारे भने सम्बन्धित निकायबाट थप स्पष्ट हुन बाँकी छ ।